الطفل والتكنولوچيا
📢 طفلك و الشاشات 🎮📺📺📱📲💻🖥️👓👓
٧ معلومات تهمك في زياده وعيك
وفي طريقه تعاملك مع إدمان إبنك للشاشات
١- الدراسات و الحقايق :
آخر دراسات علميه حديثه معتمده من الأكاديميه الأمريكيه لطب الأطفال و منظمه الصحه العالميه بخصوص موضوع الشاشات بتقول :
إنه حالياً متوسط عدد الساعات اللي بيقضيها الأطفال من ٨ إلى ١٨ سنه قدام الشاشات حوالى ٧ ساعات يومياً
(وديه كارثة)
وهما برضوا اللي بيحذروا بشكل كبير جدا من تفشي مرض جديد إسمه (الإضطرابات العقليه الناجمه عن إدمان الشاشات وألعاب الفيديو ) اللي منظمه الصحه العالميه أدرجته فعلا سنه ٢٠١٨ من ضمن قوائم الأمراض المعترف بها صحياً.
٢- التأثير السلبي
لإدمان الشاشات تأثيرات سلبيه كتيره جدا سواء جسديه او نفسيه او سلوكيه زي :
- تأخر النطق والمهارات اللغويه
- العند وعدم تقبل التوجيهات
- الارق والسهر لساعات طويله
- تغيير التركيبه الدماغيه
- يزيد من نسبه التوحد
- تشتت الإنتباه وفرط نشاط حركي
- تأخر النمو العاطفي
- سلوك عدواني
- مشاكل بصريه
- إضطراب سلوكي
- الإنطواء و الإنعزال
- البدانه والكسل
٣- توصيات الخبراء :
الأكاديميه الأمريكيه لطب الأطفال و منظمه الصحه العالميه كانوا واضحين جدا في عدد الساعات المسموح به على حسب سن كل طفل :
أقل من سنه ونص : ممنوع الشاشات خالص إلا في حالات الفيديو شات
من سنه ونص و حتى ٥ سنوات : من ساعه لساعه ونص بحد أقصى يومياً
من ٥ سنوات وحتى ٩ سنوات : ساعتين بحد أقصى يومياً
من ١٠ سنوات وطالع : ساعتين وبحد أقصى ساعتين ونص يومياً في حال وجود مواد دراسيه أو بحثيه خاصه بالمدرسه او التعليم .
٤- المحتوى
الفكره مش بس في عدد الساعات المسموح بيه . المشكله الحقيقيه في المحتوى وهو أهم العوامل اللي بتؤثر على سلوك الطفل . لازم تبقا عارف ان الطفل بشكل عام سريع التأثر والتقليد خصوصا في سنه الصغير
هنا هنسألك سؤال مهم جدا : هو طفلك بيتفرج على إيه ؟
كرتون ملوش أي معنى وهدف بيجيب تخلف عقلي بمعني الكلمه وتأخر ؟
ولا أغاني وكليبات رخيصه ممكن تبنى قناعات وأفكار تتفاجئي في يوم من الايام بأن قدوه إبنك واحد مغني بعضلات منفوخه بروتين و شخصيه تافه مش بتقدم أي قيمه حقيقيه
ولا بيتفرج على فيلم مش من عمره أساسا ويشوف بطل الفيلم بيمارس الرذيله مع البطله او بيشرب خمره وسجاير ولا بيتفرج على فيلم أكشن كله ضرب و دم و عدوانيه و منتجين الفيلم نفسه بيحذروا انه مش للاطفال اللي عمرهم اقل من ١٥ سنه
هو مش ممكن المحتوى يكون أرقى من كدا ؟
مش ممكن المحتوى يكون مفيد أكتر من كدا ؟
طبعاً ممكن
وقت الشاشات مش للكارتون والأفلام والألعاب الإلكترونيه والأغاني وبس
- وقت الشاشات لتطوير مهارات البحث عن موضوع معين هنخلي أطفالنا يبحثوا عن موضوع معين في التاريخ او الجغرافيا او أي معلومه عامه ( لوحده او مع مساعده ولي الأمر)
- وقت الشاشات ممكن يكون لتعليم البرمجه
- وقت الشاشات ممكن يكون لأبلكيشن يعلمنا عن جسمنا وعن صحتنا
- وقت الشاشات ممكن يكون برامج علميه و ثقافيه و سياحيه
- وقت الشاشات ممكن يكون لألعاب موبايل ذهنيه و حسابيه
- وقت الشاشات ممكن يكون لتعلم لغه جديده
- وقت الشاشات ممكن يكون لتعلم هوايه جديده
- وقت الشاشات ممكن يكون لكارتون بس فيه قيم وفيه أفكار إيجابيه
٥- مسئوليه مين ؟
- هو مين المتحكم في المعادله ؟
- مين المقصر واللي سبب في إن طفله يقعد بال ٥ و٦ و٧ ساعات يومياً ؟
- مين المتساهل قصاد عند و بكاء و نوبه غضب الطفل ؟
- مين اللي عليه إداره وقت الطفل بشكل صحي ؟
- مين المسئول عن وضع روتين يومي للطفل ؟
- مين المسئول عن تحديد ساعات مشاهده الطفل ؟
- مين المسئول إنه يطور الطفل بشكل سليم ؟
- مين المسئول إنه يلاقي بديل للطفل ؟
- مين المسئول عن إختيار المحتوى ؟
- مين المسئول عن الرقابه ؟
- مين المسئول عن تحديد أماكن المشاهده ؟
- مين المسئول عن وضع رقم سري على الاجهزه ؟
- مين المسئول عن وضع الأجهزه بعيد عن الأطفال ؟
٦- طيب طفلي يقضي وقته إزاي ؟
ده أكبر تحدي بيواجه الأمهات و خصوصا في فترات الأجازه
ركزي معايا وإعرفي المعلومه و القاعده المهمه ديه :
نمو طفلك و نمو ذكائه وتطور سلوكه بشكل سليم مش هيتم إلا لما يستخدم حواسه الخمسه ويعمل علاقات مع الغير . مستحيل هينمو نمو طبيعي صحي إذا قعد بالساعات يومياً يتفرج على الشاشات اللي في الغالب بيشوف من خلالها محتوى مضر أو غير مفيد في أفضل الإحتمالات.
هذكر بعض الأفكار والأنشطه اللي ممكن تكون بديله للشاشات :
- أنشطه رياضيه من خلال الاشتراك في تمارين رياضيه مختلفه و في بعض الاوقات عده تمارين علشان يطلع الطاقه اليوميه اللي عنده .
- أنشطه فنيه من خلال أعمال فنيه تتطلب التنسيق والصبر والوقت و تحسين الذوق العام .
- أنشطه ذهنيه زي البرمجه وتعليم الأنشطه الحسابيه والروبوت والأعمال الهندسيه المخصصه للأطفال.
- أنشطه موسيقيه زي تعليم آله موسيقيه معينه والتدرب عليها بشكل مستمر والتطور فيها.
- أعمال الكرافت (الأعمال اليدويه) في البيت ودي أرخص وأفضل طريقه الأطفال ممكن يقضوا فيها ساعات وهما مندمجين والأفكار مش بتنتهي وعلى سبيل المثال وليس الحصر:
فيديو ١٠٠ فكره أعمال يدويه في البيت
فيديو ١٠٠ فكره أعمال فنيه في البيت
- بديل الشاشات إنك تساعد طفلك يكتشف شغفه . هوايته . حلمه . طموحه . ويشتغل على ده ومن هو صغير .
- القرايه واحده من أهم بدائل الشاشات خصوصا للسن اللي بيقرا بشكل سليم . زمان لما كنا اطفال ومكنتش الشاشات متاحه زي دلوقتي كنا بنقرا كتير جدا . كنا زي دود القطن اللي بياكل الروايات والمجلات و القصص . عرف طفلك على القرايه من صغره . حببه في القرايه من هو لسه طفل صغير علشان لما يكبر شخصيته هتتغير للأفضل لو بيحب القرايه .
- الأفكار لسه كتير لبدائل الشاشات . بس إنتا حطه هدف ودور وإبحث هتلاقي
٧ - نقاط مهمه :
- إوعا تخلي جهاز الموبايل متاح لطفلك بشكل مفتوح
- حدد عدد ساعات محدده وإتفق مع طفلك على النظام الجديد
- نظم يوم طفلك بروتين إيجابي كله انشطه حركيه ورياضيه وذهنيه وإجتماعيه
- حط رقم سري على جهاز الموبايل
- تابع وراقب بشكل مستمر الألعاب والكارتون والمواقع اللي إبنك بيشوفها
- زود وعي طفلك بمخاطر الشاشات و الألعاب و بعض المواقع
- إوعا تخلي الطفل يفتح اي فيديوهات على اليوتيوب بدون رقابه . فيه فيديوهات موجهه للأطفال وبعيده كل البعد عن الدين والاخلاق والسلوك السليم
- إبحث مع طفلك على شغفه وهوايته
- إختار نوع الكارتون اللي بيتفرج عليه طفلك
- خليك حاسم في رفض أي نوع من أنواع اللعب او الكارتون او الفيديوهات الغير مناسبه
- خلي دايما الموبايل بعيد عن متناول إيده
- وقت الشاشات يكون في مكان عام زي الصاله مثلا مش في غرفته
- نظم وقت نوم طفلك وخليه ينام بدري ويصحى بدري
- ثقف نفسك في كيفيه اداره وقت طفلك و إبدع في إختراع أفكار وآنشطه تطوره بشكل سليم من كل النواحي الصحيه والذهنيه والنفسيه والاجتماعيه و السلوكيه
هيثم حسنى
تعليقات