السيناريو الصح .. عيش بقي ..

السيناريو الصح .. عيش بقي ..

ساعات تبقي عايز تقول كتير ، بس تكون حاسس بحالة ملل ، مخلياك مش عايز تعمل أي حاجة،

فتستسلم للحالة وتسوء معاك اكتر ، في الوقت اللي ممكن اول ما تحس بالحالة دي تعمل حاجة تخرجك علي طول من المود ده .. عارف أيه هي ؟

إنك تكلم نفسك بطريقة إيجابية وتسال نفسك انا إيه بالضبط اللي وصلني للحالة دي ، من غير بقي ما تجمع كل مشاكل الدنيا علي راسك ، وكل أحزانك والكلام ده .

إنت أكيد عارف إن ده الشيطان ما بيصدق يلاقيك كده عشان يقوم جايب لك كل القديم والجديد ويخوفك من بكرة اللي لسه في علم الغيب " إِنَّمَا النَّجْوَىٰ مِنَ الشَّيْطَانِ لِيَحْزُنَ الَّذِينَ آمَنُوا)

يعني أول حاجة حدد بالضبط .

بعد كده قول يارب وفكر أهرب ولا أواجه ؟ وصدقني المواجهة أفضل قرار لأنه حيعجل بحسم المشكلة ..

حسمت وقررت ..نفذ علي طول .. ده حيخفف كتير من الضغط اللي بتحس بيه واوعي تستلم لمخاوفك ، وافتكر دايما (الهروب هو السبب الوحيد في الفشل )

نفذت خلاص ؟

ارضي بقي باللي ربنا قسمهولك في المووضوع ده .. وفكر في اللي جاي وما تفضلش كتير تبص لورا ، أهم حاجة إن الموضوع اتحسم .

جواك لسه ضيق ومش عارف تنسي ؟

اشغل بالك بحاجة مهمة جدا وبحلم كبير شوية بشوية حيحل محل اللي كان شاغل بالك ومضايقك ..

وبعد شوية حتبص لورا وتضحك وتقول معقول ده كان مضايقني ؟!!!

طب بص بقي ..

السيناريو اللي فات ما حصلش في حياتك بأي صورة من الصور قبل كده؟

طب ليه بتعيده بنفس الطريقة .. ما تتعلم من اللي فات وعدي بسرعة التحدي الجديد ..

عمرك وحياتك أهم كتير وأغلي من إنك تضيعها بتبكي علي اللي راح أو حزين ع اللي إنت فيه أو خايف من اللي جاي ..

عيش اللحظة صح .. اسعي لرضا ربنا في كل خطوة هو عالم بيك حينصرك ما دمت قصدت بابه ..

ما هو ربنا هو الكريم ..

بقلم : المدربه منى لملوم 

مدرب تنميه بشريه