: ازاى تحقق ثروة بخطوات بسيطة

 كل شخص فينا عايز يكون عنده ثروة اللى يكون بها غنى ، و يقدر يحقق من خلالها كل اللى بيحلم بيه أنه مثلا يسافر أى مكان يحبه أو انه يشترى أى شىء نفسه فيه من غير ما يشغل باله بالفلوس اللى هيدفعها تمن للحاجة اللى عايز يشتريها . بس خلينا نعرف أزاى الحلم ده يتحقق و يتحول لواقع بكل بساطة زى ما علماء علم النفس و خبراء التنمية البشرية بيشرحوا الموضوع عشان يتحول من أنه مجرد كلام نظرى لكلام عملى ، لأن صدقنى و عن تجربة أى حاجة الإنسان لو عايز يعملها مش شرط الغنى و الثروة ، و أخلص لها و أصر عليها بشكل كبير و كان عنده صبر هيحققها يعنى هيحققها و ده مش كلامى ده كلام المولى عز وجل ( إن الله لا يغير ما بقوم حتى يغيروا ما بأنفسهم ) ( إنا لا نضيع أجر من أحسن عملا )

 و الخطوات هى :

أولا : عشان تحقق الثروة لازم تعرف أن فى أشكال كتيره من الغنى و الثراء ، فالغنى مش محصور فى الثراء المادى المالى و بس لكن ممكن تكون شخص عنده ثراء فى الصحة و الشباب يعنى مش مصاب بمرض و ميبنش عليك الكبر فى السن و ممكن تكون ثرى فى علاقاتك بالناس شخص بتعرف تتعامل مع الناس كويس و هكذا يعنى أنت ممكن تكون غنى و أنت مش حاسس لكنك شايف الثراء من وجهة نظر مالية

و ثانيا : لازم تعرف أن الثراء بيجى من الداخل إلى للخارج مش العكس يعنى لازم تكون ثرى داخليا قبل أن تكون ثرى خارجيا ، بمعنى أنك تكون مؤمن بالله و متوكل عليه و راضى بقضاءه و قدره و تكون شخص متسامح محب سعيد عندك نوع من الرضا عن حياتك ، و ذى ما بيقول مايكل هول خبير البرمجة اللغوية العصبية و عالم النفس الأمريكى ( تكوين و صناعة الثروة تبدأ داخليا أولا ثم خارجيا ) لازم تحمد و تشكر ربنا على اللى أنت فيه دلوقتى عشان ربنا يعطيك و يبارك لك ( لئن شكرتم لإزيدنكم ) لازم تشعر بالسعادة لأن السعادة فى الرحلة مش فى نهايتها

 ثالثا : و أخيرا لازم تعرف أن الثروة = قيمة ، اسأل نفسك أيه القيمة اللى ممكن تضفها و الناس تديك فى مقابلها فلوس يعنى مثلا لو واحده بتعرف تطبخ تفكر أزاى تستخدم الطبخ فى أنها تخلى الناس تشترى طبخها و لو أنت بتقعد على الفيس بوك بالساعات ازاى تجعل من حبك للفيس أستثمار بأنك مثلا تشتغل مسوق للشركات تعمل لهم دعاية أو أنك مصمم تقدر تعمل صور و أشكال ذى مجلتنا و هكذا و أتمنى فى النهاية لكل شخص قرأ المقال الغنى و الثراء فى حياته

المدرب عبد الرحمن عثمان